Кык нунал куспын.

   Котькудӥзлы тодмо дыр сыӵе шӧдон, куке вань лэсьтоно ужды, нош тӥ сое выльысь но выльысь кельтӥськоды берло дырлы. Азьло мон малпасько вал со огшоры азьтэмлык гинэ. Ӧвӧл. Вань вылэм сыӵе висён – «прокрастинация», психологиын ужъёсыз берлолы кельтонэз, пе, возьматэ. Со висёнэн студентъёс ик бӧрысь висьыны пе кутско. Асьмелэн валтӥсь героймы но луоз студент, кудӥз борды та висён лякиськыны шедьтэм. Со улэ огъяулонниын, кык интыен комнатаын, кык ярусной валесын. Комнатаысь бускельзэ кемалась ӧвӧл гинэ дышетскон интыысьтыз уллязы. Та пияшлы со марзэ-созэ ӧз вера, ас дуннеяз ветлэ вал котьку бускелез. Эшъёсыз куспын вераськонъёс ветло вал, со пияш,пе, экзаменын одӥг задачалы валэктон шедьтымтэ но, шузимыса, дышетӥсьлы кизянзэ возьматыса бызьыса потса кошкем…

    

Огдыре, студентмы «контактын» пукыкуз, эшезлэсь гожтэт вуэ: «Даров, тон курсовойдэ гожтӥд-а ни?»

Пияш соку ик ӧз вала мар сярысь гожтэ эшез. Ӧжыт улыса, ымнырыз кӧсэктӥз, сюлэмыз гадьысьтыз потымон ик йыгаськыны кутскиз.

- Ааа…кык нунал гинэ кылиз ни ук! – черектӥз со вань кужмысь,- али ик кутсконо!

  

Эшезлы номыр гожтытэк усьтэ «вордзэ», гожтэ бамлэн шораз ик «курсовая ра…», нош гожтонзэ йылпумъятэк ик вала – мар ке люкетэ татын солы. Экран шоры учкыса пытса вань усьтэм приложениоссэ, шудонъёссэ но азьланьтэ гожъяськонзэ. Кык минут ортчыса солы мӧзмыт луыны кутске, соин ик яратоно крезьгурзэ лэзе. Нош ӧжыт печатать карыса комнатаез шоры учке:

- Да, алама мынам татын…

  

 Кутске утялтыны: валессэ октэ, выжзэ ӵушылэ, книгаоссэ радъя но нош ик пуксе компез сьоры.

  

 Коня ке кылтэчет гожтэмез бере мукет книгаез усьтэ. Тыбырыз жадемысь валес вылэ выдыса гожъяськыны выре но, кӧтэз сюманы кутскемзэ вала. Бутерброд дыртыса лэсьтыкуз кетчуп кисьтыны шедьтэ. Нош ик комнатаез азьло кадь ик сазтӥське. Валаса сое, нош ик утялтӥськыны кутске.

Выльысь но выльысь озьы вырыса, быдэс уй понна ньыль бам гинэ гожтэ.

Мукет нуналаз ини лымшорозь изьыса, будильникез шоры учкыса со тэтчыса султэ но мисьтаськытэк ик курсовоез борды кутске. Нош чыры-пыры ужъёс солы туннэ но люкето гожъяськонзэ быдэстыны.

Чукна со вала быдэс уйзэ комп сьорын ортчытэмзэ но гожтыса быдтэ берпуметӥ  предложенизэ. Жогак дӥсяськыса, сиськытэк-маратэк университетэ дыртыса кошке.

   

Дышетӥсеныз пумиське. Соиз шонер ик, паймемзэ ватытэк юа студентмылэсь:

- Тӥ мар али татын кариськоды?

- Бон…вайи вал тани… курсовойме, - шуэ со, куалектыса.

- Вазь уг ай, кык толэзь сётэмын на тӥледлы ужаны.

- Мон малпай вал...

- Вайиллямды бере, вае, учком

    

Ӧсэтӥ потыкуз выльысь но выльысь йыраз дышетӥсьлэсь кылъёссэ бергатылӥз. Аслыз вож потэмезлы чидатэк вамышъяз со автобус дугдылон пала. Кык толэзь! вал на ай солэн кияз, нош со кык нуналскын йылпумъяз ваньзэ.

Гульсяська.

Со вал огшоры, мукетъёсызлэсь номырин висъяськисьтэм нунал. Шонерзэ вераса, сессиялэн кутскон нырысетӥ нуналъёсыз.Соку котьку кадь ик лекциослэсь конспектъёссэ утчаны кутскисько. Мон огъяулонни дорысен кыдёкынгес улӥсько бере, туж шер ветлӥсько эшъёсы доры. Мынӥ ке но кемалы кыльыны уг турттиськы, нош кыӵе ке вакчи мадёсъёс вераны кутско ке, одно ик чаль кошкыны уг быгатӥськы. Эше веранзэ соку кутскиз:

- Тон кылӥд вал ни-а татын азьло улэм студент сярысь одӥг тунсыко легедаез?

- Ага, общагаяды улӥсько ук, тосько,пе,  - серекти мон.

- Вот, кылзы. Татын одӥг пияш улӥз, «гульсяська» кушем ним понӥзы солы ваньзы. Сыӵе ук со огъяулонни, котькудизлы ним понозы. Со пияшлэсь аслэсьтыз нимзэ нокин но уг тод вал, ваньзы исан нимен гинэ вазьылӥзы. Чик потатэк улӥз со комнатаысьтыз. Со понна ик сыӵе кушамат сётӥзы дыр солы. Возьдаськись вал со, ырымняськись(суеверный),лачмыт, адямиослы оскись но котьку улон шоры шумпотыса учкись. Кызьы со ваньмыз ӵош огазеямын вал одӥг адями пушкын - валантэм, нош ӵош улӥсь пияшъёс ӧз яратэ сое нырысетӥ нуналъёсысен ик. Мугорлы вал со кузь но туж чиед, ныр вылаз бадӟым очкиен…ну, оглом вераса нылъёс но со шоры ӧз учкылэ. Нырысетӥ курсъёсысен ик стипендия ӧз басьтылы, малы ке шуоно, возьдаськыса тодэм юанзэ но дышетӥсьлы валэктыны ӧз быгаты.

Али кадь ик сессия кусткон вакытэ ӵош улӥсь пияшъёсыз сое сереме уськытыны малпазы. Со понна пияшъёс шедьтӥзы тунаськисез, коньдон солы тыризы но нош лыктыкузы «гульсяськаен» ӵош,  порошок сётыны косӥзы солы, экзамен  азьын юыны дэмласа. Ужрадзы пӧрмиз.

Ӵукна соку вал шулдыр, тылобурдоос чирдизы, укноын чебер толалтэ суредъёс… но экзамен. Ваньзы мисьтаськыны кошкыку, та пияш кылиз комнатаяз аслыз чаяз порошок сураны. Огназлы тросгес луэм но малпам та «гульсяська» ваньзылы пичияк сураны кружкаязы. Малпамын – лэсьтэмын. Одигезлы гинэ тырмымтэ, озьы луэм - соизлэн кружкаез та пияшлэн кадь ик тусъем пе вал. Оглом юиллям ваньзы чайзэс но кошкиллям дышетскыны. Кыкез соос полысь автобус доры но мыныса вуиллямтэ, нош куинетиез одиг остановкаез мыныса вутскем ик.

Со нунал вал туж шудо «гульсяська» понна, малы ке шуоно, нырысети экзамензэ ик сётиз витьлы но бертыса пияшъёслэсь ужрадзы сярысь тодиз. Пияшлэн юанэзлы малы соос озьы каризы, ваньзы котзэс кутыса валэктизы: «Милемлы уг кельшы тынад та кырсь улон шоры шумпотыса учкемед».

Со нуналысен нокин сереме уськытын оз выр ни сое, исан нимыныз но вазьыны оз тырше, - шуиз эше.

- Мар бон, котыд уг вись ни-а таре? – шуисько мон, серемез кутыны вырыса.

Эшъёс.

Перемена дыръя шӧдтэк шорысь столовой палан укно пилиськем куара кылӥськиз. Вань школаысь дышетскисьёс соку ик люкаськизы со интые. Отын вал таче суред: кык пияшъёс сыло ог-огзы шоры учкыса, кыкетӥез каллен гинэ аслэсьтыз сумказэ жутӥз муз вылысь. Со дыре ик люкаськем адямиосты палэнтыса, та пияшъёс доры директор вуиз. Лек учкиз шоразы.

- Кин тае кариз?

Пиос шып сыло.  Нош ик юанзэ сётӥз, нош пумитаз нокин валэктыны ӧз дырты.

Чуказеяз кык пиослэсь атай-анайёссэс отизы школае. Котьку кадь ик лыктӥзы анайёссы, малы ке шуоно, атайёссы гуртысь пиналъёслэн ӵем дыръя вахтаын ужало.

Нырысь огдырлы шыпыт возиськиз директорлэн кабинетаз. Лякыт сямо, небыт куараеныз кутскиз директор вераськонзэ:

- Тӥляд пиналъёсты пилизы столовойлэсь укнозэ. Со понна уксё тыроно луоды. Сыче милям тӥледлы луоз курон.

- Мынам пиналэ уг быгаты сыӵеез лэсьтыны!- шуыса черекъяны кутскиз нырысетиез нылкышно. – кытын соослэн класснойзы?! Со бордын со ваньмыз!

Директор потыса кошкиз.

- Кытчы со? – вожпотэмезлы чидатэк юаз нырысетӥ нылкышно кыкетӥзэ.

Нош соиз ӧз кылы сое. Аслаз малпаназ выйыса укно пала учкыса пуке вал со. Отын одӥг нымы-кибы мукетыз вылэ тубыса ураме потыны турттэ вал.

Коня ке дыр ортчыса, директор кабинетаз мукет дышетӥсен чош вуиз. Пинал дышетӥсьлэн адӟиське вал ӧжыт кышкаса возиськмез.  Осэз пытсаса гинэ вуиз, нылкышно соку ик шораз кесяськыны кутскиз. Вань ымнырысьтыз кышканэз воргоронлэн шуак берытскиз вожпотонлы.

- Кытын тӥ вал?! Тӥ обязаны соос шоры учкыса улыны!

Дышетӥсь мар вераны ик паймиз. Собере аслаз юанэзлы ик валэктон сётэм сямен азьланьтӥз:

- Со, бон, серекъя или мар?

- Мар уд вазиське?Валэктэ мыным!

- Мар бон тӥляд пиналды шоры гинэ учкыса пукыны кулэ-а мон?Уже овол-а мара мукет?

Нылкышно паймыса дышетӥсьлэн пумит ваземезлы директор пала учкиз:

- Тӥ кылӥды-а?

- Со тӥляд пиналды. Воспитание - со нырысь ик анай-атайлэсь  сётӥськыны кулэ, учкыны но пиналдэс нырысь ик асьтэос тыршоно, - шуиз небыт куараеныз директор.

Нылкышно паймиз ма вераны. Дышетӥсь ӧтиз пиналъёссэс.

Шып пукись нылкышнолэн Андрей нимо пиез кабинетэ нырысетӥ пыриз. Пияш востэм возиськиз но «Кин пилиз укноез?» юанлы трос валэктон ӧз сёт.

- Мон ӧй адзы, мон уг тоськы.

Коня ке шып гордэктыса сылэм бераз кабинетысь потыса кошкиз.

Собере пыриз Дима, нырысетӥ нылкышнолэн пиез. Таиз ассэ йыгмыт возиз. Вераз ваньзэ Андрей лэсьтӥз шуыса.

- Сумкаез мысьтым басьтӥз но укное сэрпалтӥз со.

Пияш потыса кошкем бераз директор пумитаз пукись анайёс шоры учкиз:

- Та ваньмыз номыре уг вошты. Соос вал кыкназы. Коньдон но пияла понна тыроно луоды кыкнады.

Дималэн анаез вожез потыса кытчы пырыны ик ёрмиз:

- Мон тазьы тае уг кельты! Тодо мон кытчы жингыртыны!

Дораз бертэм бераз Андрейлэн анаез пизэ дораз отиз:

- Вера ай, малы карид сое?

- Кин вераз тыныд?- паймыса учкиз пияш анаез шоры.

- Дима.

-Дима?!Пӧя со! Со пилиз со укноез но ӧз лэзь монэ вераны. Тон мар, пиедлы уд оскиськы-а?

Та учыр сярысь мыным вераз одӥг пересь бабай,кудӥныз электричкаын тодматски.Со шуиз мыным-шедьтӥд ке та учырлы тунсыко валэктон,тонэ фантазёр ик ниманы луоз. Мон шедьтӥ.

Чуказе первакъёслэн посвященизы луэ.

      - Чуказе первакъёслэн посвященизы луэ, мынӥськод-а? – юаз мынэсьтым однокурснике.

- Мыно, конечно, - малпаськытэк ик верай мон.

Таӵе кылъёсын берпумети пара бере ваче вераськонмы йылпумъяськиз. Мон тодӥсько коня ке ужрадъёс, кудъёсыз мылкыдэз бурдъяны юртто но одӥгез соос пӧлысь кытчы ке кошкыны амал. Чуказе монэ вите посвящение! Изьыны выдӥ таӵе шумпоттӥсь малпанъёсын. Пичи дыръя кадь, куке кыче ке бадӟым праздникез витиськод.

Чуказеяз кема витим автобусэз, кык час пала. Витьыку, котькудӥз тодэ дыр, эшшо но кемагес дыр ортче. Тросгес сылысалмы на ай одӥг интыын, нош кинлэн ке но визмо малпанэз кылдмукет сюрести мыныны.

Вуим «Волга» нимо лагере. Котыр туж чебер инкуазь. Одӥг дырлы аслам вордскем гуртам вуэм кадь луи. Кылем уе изён азьын кадь шумпотон бугыртӥз сюлэмез.

Кызьы ке но озьы луиз, юрттыны кутски «кышкыт комната» этапын. Тунсыко вал нылъёс шоры учкыны. Нырысь шурдыт вал соослы пырыны ик отчы. Тодмотэмэз кышкатэ меда вал, яке сьӧд буёлэн гинэ саптаськемзы уг пот вал. Берло соослы кельшиз ик, куд-огез нош ортчыны малпало вал. Пияшъёс сярысь мон уг ни вераськы, малы ке шуоно, сыӵе мероприятиосын соос уг тыршо шулдыръяськыны. Малпасько, зэмос улонын соос лэсьтыло дыр трос янгышъёс.

Концерт оформление лэсьтэмын вал кыӵе ке америкаысь бандитской стилен. Мыным шуизы та ваньмыз жогак лэсьтэмын, но мон малпасько, куддыръя озьы малпаса лэсьтэмлэсь но умойгес пӧрме. Сои ник дыр мылкыд ӝутскиз вал шедьтыны буёлэн пыӵал но ваньзэсты  ыбылыны.

Чылкыт омыре потэм бере вал малпанъёс йӧ вылтӥ бызьыса кошкыны, вань шуг-секытъёсты вунэтыса. Пичи дыръя ми котьку йӧ вылын пеймытозь шудӥськом вал.

Куддыръя ву пушкын улон сырысь малпанъёс кылдо. Шур шоры синмез басьтытэк учкиськомы ук. Соку сюлэмлы но капчи луэ, мылкыд но ӝутске. Азьло школаысь бертыкум котьку дугдыса, кема учкыса  пукем потэ вал шур дурын. Сыӵе дыръя ваньмыз вунэ, ваньмыз кошке вал палэнэ.

Ваньмыз та ужрад быриз, котькуд лагерьёсын кадь ик, сюсьтыл котырын. Нырысетӥ курсын дышетскисьёс люкаськыса пуксизы но вераны кутскизы: маин кылиз сюлмазы та шудон-праздник. Котькудиз кутскиз аслэсьтыз веранзэ татчы лыктэм потымтэеныз. Мон но азьло озьы ик малпасько вал но, ваньмыз воштӥське. Жаляса верано, таиз берпуметӥез удмурт кылосбур факультетлэн аслаз посвящениез. Берло дыре факультетмы сыӵе югдуре сюриз - огазеяськоз журналистика факультетэн ӵош. Трос вераськон мынэ та ужпум ласянь,нош мынам осконэ вань, выль кутскон азьлане гинэ нуоз,малы ке шуоно, удмурт шаерын удмурт кыл дышетон лябомиз ке эшшо но - марлы со ваньмыз пӧрмоз?Озьы луыны кулэ овол,со янгыш. Малпасько,  сыӵе ужрадъёслэсь азьланяз но удмурт кыл уз ышы но юнгес азьланьтӥськоз гинэ.

Пияшлэн шузи малпанъёсыз.

Одӥг паймымон чебер ӝытэ егит пияш трос этажъем коркаысьтыз ураме потыны ӧз дырты. 16 аресъем Саша компьютер сьӧраз кисьтыса пукиз ас малпанъёссэ: «Ваньзы монэ вунэтӥзы… Матысь адямиос но монэным уг верасько ни. Трос дыръя кесясько шорам, мар ке но весяк куро мынэсьтым. Соос одӥгзэ валаны уг быгато – соос мыным юрӟымесь пото. Мынам уг поты та шимес дуннеын улэме. Оло та ваньмыз ад?»
Та кылъёс бере пияш укнояз учкиз. Укно вӧзы ик, валантэм сямен, шарик биниськем. Саша малпаськыса ик ӧз кылльы, шарикез басьтоно кариськиз. Киеныз сузьтӥськыса ӧз вутты, пыдыз гылӟыса пияш уллань лобиз. Соку ик Сашалэн вань улонэз син азяз пуксиз. Дыр каллен ортчиз ке но, пияшлы шӧдтэк шорысь туж вӧсь но син азяз тём пеймыт луиз.
Кема дыр ортчытэк югыт тыл адӟиськиз. Со тыл шонер сюресэз югдытэ. Сюрес дурын азьлань нуись кеньыр сылэ. Кӧня ке вамыш лэсьтыса, Саша пересез адӟиз. Со ялан тыршыса кеньырез тупатэ вал. Пияш тодмаз со пересез. Песянаез доры ветлыку, солэн туспуктэмез рамкаын сылэ вал. Со пересь Сашалэн Федор нимо песятаез луиз. Пияш номырзэ валатэк юано кариськиз;
-Малы тон кеньыр пуктӥськод?
Пересь мур лулӟиськыса вазиз:
- Мынам уг поты асьмелэсь семьямес мукет сюрестӥ лэземе. Семьямы узьмаке гинэ мед сюроз.
- Та узьмак-а мар-а?
-Азьлань вамыштид ке, ваньзэ ачид адӟод.
Саша озьы ик кариз. Вамыштӥз азьлане. Мынонъяз со 2-3 арлы пичигес вынёссэ адӟиз. Соос котькуд пулэ корӵог шуккыса песятайзылэн пумитаз лыкто вал. Александр дугдыса соослэсь юаз:
-Мар тӥ татын кариськоды?
Нош соос пияшлы номыр ӧӟ вазе. Со куспын азьпалаз Саша мар ке но тодьыез синйылтӥз. Паймыса со азьлань вамыштӥз. Отын со тӧдьы дӥсяськем пересез адӟиз. Пал кияз пужым вай, нош кыкетӥяз сюмык кутыса сылэ вал. Федор каллен Сашалэн тыбыр сьӧраз султӥз но шыпытак гинэ вераз: 
- Со вӧсясь. Со куронсётонъя сэбедъёсты нуэ. Асьмеос шудо мед уломы шуыса со Инмарлы вӧсяське.
-Нош малы пудо-животлэсь вирзэ, лыоссэ, кӧня ке сильзэ ӝуато?
-Ӵын вылӥе Инмар доры мед ӝутскоз шуыса. Асьмелэсь вӧсяськеммес мед синйылтоз шуыса. Тыныд, пие, вазь на узьмаке. Тыныд кошконо татысь.
-Кызьы?
-Татын вань одӥг потон инты. Но татысь кошкон понна тон огнад убиръёс пыр потоно луод. Мыным отчы уг яра. Мон возьмато тыныд сюрес. 
Саша тодмотэм сюрес кузя кошкиз. Кема мынӥз. Бусыын бызьылӥсь тӧдьы валъёсты пумитаз. Соос сьӧрысь пияш югыт тыл адӟиз. Котырысьтыз номыре шӧдытэк бызьыса кошкиз. Собере кытысь-марысь валантэм бӧлетэ сюриз.
Отысь Саша серекъяса сылӥсь пересь песянаез адӟиз. 
-Тӥ кин?-юаз солэсь пияш.
Но пересь ӧз вала серекъяса дугдыны. Кӧня ке дыр ортчыса со шуак чалмытскиз но валантэм кылын зульыны кутскиз. Берло валаса выллем удмурт кылзэ поттӥз:
-Тон алдэтэ сюрид. Табере тон улдуннее вуод. 
Пересьлэсь кылъёссэ люкыса кыӵе ке но тодмо куара кылӥськиз. Со куара кужмогес но кужмогес пель сьӧры шуккиськыны кутскиз. Бӧлет дымбыр-дамбыр куашканы ӧдъяз. Нош ик пеймыт луиз. Саша усьтӥз синъёссэ. Вӧзаз будильник, компьютер, Владимир Владыкинлэн «Религиозно-мифологическая картина мира удмуртов» книгаез кыллё вал. Пияш паймыса укное учкиз. Отын писпуосысь ӵужектэм куаръёс каллен гинэ пичи сюрес вылэ лымы выллем усё. Саша ныр улаз нукыртӥз:
-Вӧтаськем...

Песянайлэн мадёсэз.

Одӥг шимес бер сӥзьыл нуналэ мон школаысен гуртэ бертӥсько вал. Корка вуон понна котьку кадь ик ортчоно луисько шуръёсты но кӧшкемыт нюлэсъёсты. Нош одӥг пичияк шурез потыкум пумитай пересь песянаез. Та интыын кинэ ке пумитан сярысь малпанэд но уз лу… Соин ик пересь монэ туж паймытӥз.

         - Кытысь тӥ, песянай?

         - Ма, татысь ик, - шуиз со мыным кажга куараен.

         - Мар бон тӥ татын кариськоды?

         - Малпаськисько ай тани… мар таре кароно, - одӥг дырлы малпаськонэ усиз но, шуэ – Вералом-а тыныд, пие, пичияк мадёс?

         Лякыт сямыз адӟиське вал кадь солэн ымныраз, быдэсак кисыриё ке но, нош синъёсыз…туж синмаськымон чебересь.

         - Бон, вералэ, -  мынектӥ мон.

         Кутскиз ваньмыз Матӥлэн Петыр нимо пияшен тодматскемез бордысен. Со туж чебер йӧно пияш вылэм, вань нылъёс бергаллям со котырын. Арганэныз крезьгурзэ шудэ ке, соку ик ваньзы люкасько но котыраз кырӟаны но эктыны кутско вылэм. Нокин кулэ ӧвӧл вылэм Петырлы, Матӥлы гинэ сюлэмзэ усьтэм.

         Ветлэм Матӥ Петырен ӵош кык толэзь пала. Соку ик шӧдтэк шорысь пеймыт ужрад азинскем гуртазы. Котькуд толэзь одӥген одӥген нылашъёс ышыны кутскиллям.  

         Чакласькыны кутскем со Петырзэ, соин сэрен но мар ке ӧвӧл меда шуыса. Шонер. Паймытӥсез вань вылэм. Котькуд толэзь пияшез пумиськылэм выль нылашъёсын. Одӥг пол Матӥ синйылтэм кызьы Петырез шур доры васькыкуз нылашен ӵош бус полы ышем. Нош ик шур дуре васькыкуз матысенгес адӟыны малпам та паймытӥсь ужрад шоры. Петыр сылэм шур дурын, нош нылашез сьӧд куараен кесяськыса ву пушкы пырыса кошкем. Вуысен соку ик потэм пересь вож турын-куаръёсын. Пияшен куспазы мар ке вераськиллям. Матӥ соосты кылымтэ ни.

         Соос кошкем бере, ву дуре матэ лыктыса учкем но отысь адӟем нылашлэсь ымнырзэ. Соиз синзэ кынем Матӥлы. Кышкаменыз берлань кошкыкуз шуккиськем мар ке борды но учке… Петырез пумитаз сылэ.

         Ог-огзы шоры кӧня ке учкем беразы Петыр юам солэсь:

         - Мар тон татын кариськод?

          - Мон… мон… - кышкаменыз Матӥ мар вераны но тодымтэ.

         - Мар мон, мон… Мынам ваньзэ умоен лэсьтэм потэ вал, нош табере луоз кызьы кулэ.

         Пияш сое йырсьытӥз нюж кыскыса нуиз шур дуре. Со дыре ик вуысь потӥз пересь песятай, быдэсак вож турын-куаръёсын бинялскемын. Кызьы гинэ ӧз пумитъяськы нылаш, номыр каремез ӧз луы солэн.

         Вумурт учкиз нылаш шоры, собере пияш шоры но шумпотыса мыняз.

         - Быгатӥд уске аслэсьтыд яратондэ мыным кузьманы?- куараез вал солэн векчи но кыӵе ке ӟазырес.

          - Мон жади, мынам уг пот ни та кӧшкемыт ужрадэз лэсьтэме. Тон шуид, аслэсьтым яратонме тыныд сётӥ ке, кельтод мыным та чеберлыкме но кулэ уз лу ни котькуд толэзь нылашъёсты нуллыны ву доры.

         - Шонер, Сандыр.

         Матӥ шыпыт кыллиз, немар верамез луытэк. Нош со валаз малы Вумурт пияшсэ Сандыр шуыса нимаз. Ку ке но азьло Сандыр нимо пияш сьӧраз ветлэ вал, ымнырыз вал солэн туж шӧтэм. Нокин соин уг вераськы вал тусбуез понна. Одӥг нуналэ со пияш ышиз, нокин сое собере ӧз адӟы ни.

         Вазьыны тырше вал но Матӥ, соку ик сое Вумурт ас дораз кыскыны ӧдьяз.

         - Сыл! Мон тыныд вераса ӧй быдты на, - шуиз Вумурт Петырлы. – Яратонэз ултӥян – берпуметӥ алама уж со. Сыӵе сюлэмо луэмед понна тон берытскод излы. Со дырысен Петырез нокин ӧз адӟылы ни…

         Одӥг дырлы ву шоры учки но малпаськонэ уси:  адӟеме вань ук кытысь ке со излэсь адямиосты. Асьме дыре котькуд адями урамын сыӵе излэсь ымнырен ветлэ ук…Тӥни кытысь со… Песянайлэсь юаны малпасько вал но, олокытчы ышем. Котырын нокин ӧвӧл. Шур доры матэгес васькыны малпай. Кин бон тодэ, та шуре пыртэм ке Вумурт со Матӥез? Пыдесъяськи но учкыса кыллисько. Вуын отӥ-татӥ чорыгъёс уяло, со сяна немар ӧвӧл кадь. Шӧдтэк шорысь син азям адӟиськиз нылашлэн ымнырыз. Мон кышкаменым берлань кошки но мар ке борды шуккиськи. Отын излэсь йыр кылле вал. 

         Вуысь потӥз пересь но мыным векчи куараен шуиз:

- Мар тыныд кулэ, эше…

Гужем орчытэм сярысь.

Гужем ортчытэме сярысь верай ке, иземды потоз, эшъёсылэн кадь ик. Куддыр серем веросъёс вераны тыршисько но соослы, ӝыныяз ик ымзэс паськыт-паськыт усьяны кутско ни. Уг быгатӥськы малы ке но вераськыны, малпанъёсме чебергес усьтыны. Соин ик мон гужемлэн кутсконэз сярысь гинэ мадё… Ваньмыз кутскиз сессиез  сётэм бере! Студентъёслэн со тужгес но шулдыр дырзы: ваньмыз сётэмын но тон луиськод эрико. Практика вань на. Быръён бадӟым ӧвӧл: яке тон мынӥськод кыӵе ке пеймыт гуртэ, яке Ижкарын ик пукод УдГУлэн аудиторияз комп азьын. Бон, мон кема ой малпаськы, бырйи соизэ, кудаз вань инкуазь, выль адямиос но выль шӧм тодонъёс.

         Мынӥм ми куинь час пала. Мон соку ик синйылтӥ нылашез, кудӥз ми сьӧрын крутой машинаен ширтэ вал. Бур кияз кальянлэсь трубказэ кутыса гань-гань ӵындыса мынӥз. Быдэс сюрес ӧз кельты малпан: кызьы со эгырен гомась арбериез пыртэм машинаяз?

         Кематэк витьыса вуим Вуж Какся гуртэ. Спортзалын матъёс вылын изим. Собере гуртысьтызы лавказэс утчам. Гуртзы бадӟым ке но пинал адямиос отын ӧжытгес ик. Мынам туж потэ вал чеберъяськыны нылашъёс азьын, возьматыны кыӵе мон городской, дышетскисько вышкаын но как-будто нырысьсэ адӟисько таӵе гуртэз (хотя, ачим ещё но пичигес гуртын улӥсько). Самооценкае вал вылӥын! Мылкыд аслым туж кельше! Кылсярысь, сессия дыръя нокинлы кулэтэм адями кадь ветлӥськод… нош татын тон -  эксэй.

         Милемын вал дышетӥсьмы – Галина Николаевна. Лякыт сямо, шулдыр мылкыдо но туж ненег адями. Кинлы ке но та дышетӥсь практика бере кельшыны кутскиз, кинлы ке но дышетскон дыре ик. Мон валай солэсь умой адями луэмзэ дышетскон кутскыку ик. Милемын вал на Галина Николаевнамылэн ӵош дышетскем эшез но. Со но сыӵе ик небыт сюлмо адями. Берло ми сое УдГулэн корпусаз пумитам, озьы ик шуныт серем пыр ӟечъяськиз милемын. Эше вераськыны кылиз на соин, нош мон ӟечбуръяськыса кошки, уг яратӥськы трос вераськыса сылыны.

         Быдэс арня ветлӥм Вуж Какся но Чуръя гуртъёстӥ. Трос люкам фольклорной материалъёсты. Уноез милемыз паймытӥз. Котькудаз ӝытэ матъёс вылын выдыса кылльыкум, выльысь но выльысь тодэ вайылӥ адямиослэсь верам кылъёссэс. Кылсярысь, кызьы гурезе тубыкуз начар нылкышно кужмез бырыса отчы ик кулэм, нош пиналэз бӧрдыса черекъям: «Султы, султы анай!». Озьы ик нималлям гурезез «Султанай». Мукетэз тунсыко верос вал ведонъёс сярысь, кызьы соос дышетскыны ветло вылэм одӥг гинэ гуртысь интые. Ваньмыз син азьын берга вал, фантазие усто ужа сыӵе дыръёсы.

         Берпуметӥ нуналэ милемыз куризы концерт возьматыны. Возьматӥм. Кызьы юртэмме уг тодӥськы, тросгес люкетыса ветлӥ кадь мон отын.

         Удмурт дискотека но ортчытӥм.

         Чукна вазь султыса ширтӥм Можгае. Пичи кар гинэ кадь но одӥгзэ валай: катрадлыкез утисьёслы татын уж одно ик вань. Малы ке шуоно, котькытын юэм адямиос, тӧден-сьӧд туспуктэмъёс борддор бордын…Однокурсницаос кылизы автобус витьыны, нош мон вокзалэ пыри, электричкаез витьыны. Озьы доре бертыны капчигес. Коня ке улыса, возам лыктӥз пияш телефонме курыса, пӧяй батарейкаез пуксиз шуса. Отчы ик телефонтэк кыльысал. Соиз гинэ кошкиз, вуиз воргорон, ымнырызъя ньыльдон арес сётыны луэ. Вазиз со мыным:

- Здорова, мужик!

- Здравствуйте,- шуисько, паймыса.

Мынам, шуэ, пие, пе, тон быдӟа ик вал. Виизы, пе, сое. Котьку бӧрдӥсько шуэ, таӵе пияшъёсты адӟисько ке.

         Со бӧрдӥз…Мон мар вераны паймыса сылӥ. Электричка вуэм бере киез ог-огмылы сётим но воргорон шып гинэ берытскыса кошкиз. Сюлмез вось кариз солэн кылъёсыз. Кызьы ке но буйгатскон понна пукси кык нылашъёс доры. Уг тодӥськы ни кызьы кутски вераськонме, нош серематыны быгатӥ кадь ик.

         Котьку кадь ик агае пумита вал вокзалын. Синъёсыз мур малпаськисесь вал. Мынам мылкыды вал капчи, соин ик йыре но ӧй пырты мар сярысь быгатэ али братэ сюлмаськыны. Шундыё вал куазь, туннэ кадь ик син азьын. Ми ӟечбуръяським, ӟыгырским но машинае пуксьыса кошким. Ӝыны сюресэз шып мынӥм, нош собере агае шып гинэ шуиз:

- Мынам… тыныд одиг веранэ вань, Коля… секыт кутскыны… 

Выль ар.

Выль ар – со одӥгез улонысь тунсыко дырмы,куке асьмелэн ӝутскемын луэ мылкыдмы но ческыт сиён-юонъёсын тачак тырмытэмын холодильникъёсмы.  Дас кык часлэсь азьло со сиёнъёсты йӧтыны уг яра (уката ик зимний салатэз).

Мон азьло витисько вал со нуналэз, малы ке шуоно, соку гинэ кык каналын ик трос шулдыр программаосты возьмато вал. Теликмы лэзиське вал кык проводъёсты огез борды огзэ зибыса но возьматэ кык каналэз гинэ. Бадӟымгес классъёсын дышетскыку, выль арез дорын пумитам бере, потӥськомы вал эшъёсын кытчы ке калгыны. Нырысь малпаськиськом вал мар карыны, кудаз сьӧр гуртэ кошкыны, кинэн пумиськыны но  кызьы оглом та шулдыр ӝытэз ортчытыны. Ӵем ик ваньмыз малпанмы уг быдэсмы вал. Таиз учыр но малпам планъя ӧз мыны.

Котькуд выль аре кадь пуким нырысь дорын, анайёсмылэн пӧрам сиёнъёсынызы кӧтэз тырмытӥм но потӥм ураме. Пумиськыны вераським вал гурт пумын. Кин мар вайыны тыршиз соку: огез шампанскийзэ поттэм, мукетыз  сур вайыны быгатэм. Шумпотэмез валатэк огзэ бӧрсьы огзэ юим ӟенеликъёсты – сыӵе дыръя кутске астэ эрико шӧдон. Валамон ни, юыны милемыз уг лэзё вал, нош косэмъёслы пумит мыныны пинал дыръя котьку шулдыргес.

Шӧдтэк шорысь олокытысь кужмо крезьгур куара кылиськыны кутскиз. Сьӧргуртысь шуыса малпамы. Ӟенеликъёсмес  серпалляса киямы куасъёсмес кутӥмы но ширтӥмы со гуртэ. Али кадь тодӥсько на, выль ар юонмы мылкыдэз оломар кадь пуромытӥз. Куинь-ньыль иськем мыноно вал со гуртозь. Одӥг эшмы коня ке висе вал, нош кытысь ке кужым шедьтыса ми сьӧры гызмыльтӥз ик.

Милям гуртмы люкиське кык урамлы но мукет ульчаысь пияшъёсын азьло дырысен ум эшъяськиське. Нылъёс кык ульчалы  вить кузя гинэ вал. Мукет урамысь пияшъёсын,  нылъёс понна жугиськыны ум тыршиське вал. Соос тросгес. Валамон, дыр, соин ми ӵем ветлылӥмы куасэн бускель гуртэ.

Мынӥмы сьӧр гуртэ салдатъёс выллем: котькудӥзлэн аслаз вамышез, нокин ӧз кошкы азьлане, нокин бере но кыльыны ӧз тыршы.  Пеймыт инбам милемлы кужым сётӥз кадь, нош толэзь сюресэз югдытӥз. Чурыт лымы вылтӥ куас чальгес азьлане нуэ.

Куинь иськем тыбыр сьӧрын вал ини. Крезьгур куараос кылӥсько вал кужмогес но отын но татын адскылӥзы фейерверкъёс. Кин ке но шуиз на соку  «учке, киноын кадь асьмеды пумитало, салютъёсын».

Ми вуим со кряшенъёслэн гуртазы. Шедьтӥм коркаез, кудаз азьло пырам вал. Капказэ усьтыса пырыны кутским но пумитын адскиз пунылэн бадӟым карез. Соин но кышкыт вал корка пырыса кошкыны, нош нылъёсты но отьытэк нокызьы уг луы. Мар гинэ ом каре ми соку: шуламы но, векчи изъёсты но укное лэзьямы. Нокин ӧз поты, пуны но шып улӥз. Вань кужымме люкаса мон малпай со корка пырыны. Каллен гинэ, шыпыт, пуны медаз кылы шуыса пушказ вамыштӥ. Пырыса вуэм бере, пеймытын нылъёсты утчаны кутски. Кык пересьёс гинэ изё вал валес вылазы. Кышкаменым ӝоггес бызьыса потӥ отысь. Монэ кылыса карысьтыз пичи пуны потӥз но кужмысь утыны кутскиз. Ӝоггес бызьыса кошкимы эшъёсын.

Ӧжыт гуртазы калгыса шедьтӥм нылашъёслэсь корказэс. Тодматскимы вал ни ми соосын мукет гуртын кылем гужеме, куке соос вить иськеме лыктӥзы вал клубе пияшъёс понна.

Доразы вал шуныт, ческыт сиён-юонэн тыр ӝӧк, сэрегын выль телевизор. Милемлы возьыт потӥз номыр салам ӧм вае шуыса. Шунтиськеммы бере вераськонмы но нылъёсын азьлантӥськиз, возьдаськон но ышемын вал ни. Кема шумпотыны ӧз луы, ӧс усьтӥськиз но корка пыриз кыӵе ке но тодмотэм пияш. Ӟечбуръяськытэк ӝоген со потыса кошкиз. Соку валамон вал ни, та тодматскон номыр умойзэ уз вайы милемлы. Ури-бери дӥсяськыса но нылашъёслы номыр валэктытэк ми коркась бызьыса потса кошким. Вань кужмысь, сюлэм тэтчыса потытозь соку пегӟим. Берлань учкыку ми сьӧры ог-дасо адями  ворттэ вал ни.  Котькуд пала пазьгиським эшъёсын но мон кыӵе ке мунчо сьӧры ватскыса кыли. Сыӵе дыръя уд кышкаськы нокыӵе мунчо кузёослэсь, одӥгез гинэ кышкатэ – кряшенъёс ки улэ сюрыны. Кӧня дыр ортчиз со мунчо сьӧрын уг тодӥськы, нош соку верай аслым - нылъёс доры та гуртэ пыдме ноку но уг лёгы.

Ял карем бере вамыштӥ куасъёсмес ватэм интые. Эшъёсы серекъяса сыло вал ни куассы дорын. Мон но шумпотыса ымнырыным лымые уси. Адямиез уд вала: али гинэ кышкаса кулыны дасяськоз, табере гор-гор серекъялоз мозмытскемезлы шумпотыса.

Мукет выль арез бигер гуртын пумитамы. Пинал дыр трослы дышетэ кадь но, ачид ваньзэ аслад мугореныд ӧд ке шӧды, номырзэ уд вала та улонлэсь. Трос тунскыоез вал мукет выль ар юмшанъёсы но. Пересьмем бере одно ик луоз ни мар вераны пичи нунокъёслы…